GORPUTZ HEZKUNTZA EMOZIONALA

GORPUTZ HEZKUNTZAKO III. TOPAKETA

Ekainaren 25ean, Iurretako institutuan Euskadi mailan Gorputz Hezkuntzako 3.topaketa ospatuko da. Egun hori Gorputz Hezkuntzako irakasleon topa-gunea izanik eta azken urteetako esperientzian oinarrituz 100 bat irakasle elkartzea aurreikusten da.
Bertan esperientzia eta bizipen profesionalak elkarrekin trukatzeko eta proiektu berritzaileak ezagutzeko aukera egongo da. Jardunaldi honek bere helburuen artean Gorputz Hezkuntzako hainbat irakaslek ikastetxeetan arloko espezialista bezala jasaten duten isolamendu profesionala gainditzen laguntzea ere izango du.

Topaketa eremu ezin hobea da GHko espezialistok gure kezkak elkarrekin argitzeko, hausnarketak bideratzeko, beste kideek garatutako lana ezagutzeko, beldurrak gainditzeko, lorpenak behatzeko, akatsetatik ikasteko, berrikuntzak ezagutzeko eta elkarrekin arloko etorkizuna diseinatzeko. Hau guztia giro lasaian eta garrantzia emanez alde batetik, alderdi profesionalari eta bestetik, alderdi afektiboari. Topaketa hauen bidez garatzen diren harreman berriek, bide batez ikastetxeetako eguneroko lana errazago bihurtuko dutela sinisten baitugu.

Ez dago zalantzarik jardunaldia aukera paregabea dela hausnarketa pedagogikoa egiteko eta profesional bezala garatzeko eta aberasteko. Aurten aukeratu den gai nagusia Emozioen Gorputz Hezkuntza (Berrikuntza pedagogikoa) da, eta gaia jorratzeko Irene Pellicer aditua izango da bertan. Horretaz gain, hainbat mintegietako aurkezpenetan beste eduki edo gai batzuk ere jorratuko dira. Adibidez GHn ikerketa esperientziak.

Garbi ikusten dugu gure eguneroko lanaren hausnarketaren eta ebaluazioaren ondorioz gure metodologia eraiki eta berritzeko aukerak sortuko ditugula.

Gorputz Hezkuntza emozionala kontzeptu berria da, Gorputz Hezkuntza eta Emozioen Hezkuntza elkartzen dituena. Gorputz Hezkuntzak mugimen ekintzen bidez tresna paregabea ematen digu emozioen bizipenak izateko eta lantzeko: Kirol jardueretan, jarduera psikomotrizetan, jarduera artistikoetan... emozioek leku garrantzitsua betetzen dute. Bai lehia irabazterakoan, bai galtzerakoan, lankidetzan aritzerakoan,aurkaritzan aritzerakoan,taldekatzeak egiterakoan, erronkei aurre egiterakoan, arauak betetzen ez direnean, ikusleen aurrean emanaldi artistikoak eskaintzerakoan, natur ingurunean geure buruarekin eta besteekin interakzionatzean e.a.

Alde batetik, ikasleen garapen emozionala gizakiaren ongizatearen ardatz bezala ulertzen da. Bestetik, emozioak oso garrantzitsuak dira nortasunaren eraikuntzan. Ikasleen garapen osoan,beraz, ezinbestekoa da emozioen garapena ematea. Horretarako emozioen ezagutzan, kontzientzian eta gestioan laguntza eskaini behar diegu ikasleei. Azken finean, pertsona orekatuagoak eta zoriontsuagoak izaten laguntza emango diegu eta ziur bizitzan zehar izango dituzten erronkei errazago egingo dietela aurre.


Helburuak:

- Hausnarketa, berrikuntza, harreman eta trukaketa eremua erraztea Gorputz Hezkuntzako arloaren inguruan lan egiten duten kideen artean.
- Emozioen hezkuntza GHn berrikuntza hezitzaile bezala eskaintzea irakasleei.
- GHko irakasleen artean diseinatu den LHko GHko programazio bateratua aurkeztea.
- GHko mintegi desberdinetako (Leioa, Durango, Lasarte) urte osoko lana ezagutaraztea eta hauen koordinazioa bultzatzea.
- Arloak dituen prestakuntza beharrak antzematea.
- GHko espezialisten artean erlazio pertsonalak bultzatzea.


Egitaraua:

- 9:00: Harrera
- 9:15: Hitzaldia: “EDUCACIÓN FÍSICA EMOCIONAL” (Irene Pellicer Rollo)
- 11:15: Atsedenaldia
- 11:35: GHko mintegiek (Lasarte, Durango eta Leioa) egindako lanen aurkezpena, LHko GHko programazio bateratuaren aurkezpena.
- 13:00: LHko esperientzia: “Ekintza ikerketa esperientzia bat Gorputz Hezkuntzan” (David Fernandez, Huheziko Miker ikertaldeko partaidea)
DBHko esperientzia bat
-14:00: Topaketaren amaiera